Toekarena

Partagé sur :
• facebook

Anisan`ny sehatra iray lehibe ahafahana mitaratra ny tanjaky ny firenena ny fahasalaman`ny toekarena ao aminy. Misy anefa ny fepetra tokony ho feno amin`ny lafiny maro hijerena an`izany ary ohatra amin`ireny ny fitarafana ny fomba fiainan`ny olona tsirairay ao amin`ilay firenena.

 Raha ny eto Madagasikara manokana no asian-teny dia miharihary toy ny vay an-kandrina ny fahantran`ny Malagasy. Mazava ny tarehimarika omen`ny Banky maneran-tany fa 80%-n`ny Malagasy dia miaina anaty fahantrana, mivelona amin`ny 1,9 dolara isan`andro, izany hoe 6000 Ar eo ho eo (1$ : 3190 Ar). Raha io vola io tokoa mantsy no hotsinjaraina dia tsy ampy mihitsy iveloman`ny olona iray ao anatin`ny iray andro manoloana ny fisondrotam-piainana eto ary misy aza moa ary tsy vitsy no mbola latsak`io no ananany. Manaraka izany, ny Malagasy no faha-5 eran-tany amin`ny fananana zaza tsy mandeha an-tsekoly ary maro ihany koa no tsy lasa lavitra amin`ny fianarana. Mibaribary ihany koa ny fahalatsahan`ny fahefa-mividy eto an-tanàna ary miteny  ny tarehimarika satria dia 13% monja no manana jiro ao an-trano. Raha ny lafiny tanjaky ny toekarena indray dia marefo i Madagasikara, ny trosa babena etsy an-daniny fa eo ihany koa ny fandaniam-bola mihoapampana ataon`ny mpitondra. Ny  tsy faharesen-dahatra misy amin`ny mpamatsy vola amin`ny mpitondra koa manginy fotsiny ka mihantona daholo ny famatsiam-bola. Mbola maro no azo resahana ny amin`ity fahantran`ny firenena ity ary tsy azo afenina ireo zava-misy hita eto saingy mahagaga ny maro ny fahaizan`ny fanjakana milalao tarehimarika manakona ny fahasahiranana. Mieritreritra angamba izy ireo fa bado daholo ny Malagasy ka manaiky hambakaina foana.

Tsiry

Tia Tanindrazana

Samia mijoro ho an'i Gasikara.