Toekarena

Fitaterana ana habakabaka Tsy mety tafarina ny Air Madagascar

Toekarena
Alarobia 18 Desambra 2019

Ny 30 novambra 2017 no nisy fifanarahana nataon’ny fitondrana teo aloha Hery Rajaonarimampianina sy ny kaompania Réunionais Air Austral momba ny fanarenana ny kaompaniam-pitaterana Malagasy.

Nanomboka tamin’izay dia tapaka fa ny 51 %-n’ny fitantanana dia nosahanin’ny kaompania Air Madagascar ary ny 49 % kosa no an’ny Air Austral. Ny 12 oktobra 2017 no voafidin’ny filankevi-pitantanana ho tale jeneraly vaovaon'ny Air Madagascar i Besoa Razafimaharo. Hatramin’izao dia tsy mbola tafarina ihany ny Air MAD. Mitohy ny fitarainan’ny mpanjifa amin’ny kalitao, ny fahataran’ny sidina lava sy ny fahasimbana matetika an’ireo Airbus roa A 340 manginy fotsiny. Tsiahivina anefa fa nandoavan’i Madagasikara 101 tapitrisa dolara tamin’ny Air France ireo noho ireo olana maro samihafa. Hatreto dia tsy nahavita nanarina ny kaompaniam-pitaterana malagasy ny fiaraha-miasa natao tamin’ny Air Austral izay kaompania fantatra ihany koa fa ao anatin’ny fahasahiranana ara-bola tanteraka amin’izao fotoana. Tonga hatramin’ny fametraham-pialan’ny Tale jeneralin’ny Air Madagascar, Besoa Razafimaharo tamin’ny faran’ny herinandro teo ny raharaha. Anio no hankatoavin’ny mpikambana ao amin’ny filakevim-pitantana na tsia io fangatahana io ary handrasana ny tohiny .

Tsirinasolo