Toekarena

Fitantanana ny harena an-dranomasina Saropiaro amin’ny azy ny mpanjono avy any Atsimo

Toekarena
Alarobia 23 Mey 2018

Nisy ny atrikasa notanterahan’ny fikambanana mpanjono MIHARI tany Mangily faritr’i Toliara nanomboka ny 16 mey ary tapitra tamin’ny zoma 18 mey teo. Atrikasa niarahana tamin’ireo mpanjono madinika maherin’ny 50 ary nanaovana fifanakalozana sy fifampizarana, indrindra fitadiavana vahaolana ny amin’ny hetahetan’izy ireo. Araka izany dia nitodika amin’ny fanatsarana ny fitantanana ny harena an-dranomasina izay fiveloman’izy ireo ny atrikasa.

 Anisan’izany ny fanamafisana ny fahaiza-manao sy fanentanana ny faritra Atsimo amin'ny lafiny fiarovana ny tontolo an-dranomasina. Izany dia hiteraka fanatsarana ny sehatra fiharian’izy ireo ka hampitombo hatrany ny fidiram-bolany. Ankoatr’izay dia eo ihany koa ny tokony hananganana ny lalàna mifehy ny jono miaro ny eny amin'ny moron-dranomasina. Ao, ohatra, ny tokony hamerana ireny fitaovana lehibe enti-manjono izay mamotika ny tontolo an-dranomasina ireny. Tahak’izany ihany koa ny tokony hanomezana toerana malalaka voatokana ho azy ireo mba hanaovany ny asa fanjonoana ka tsy hoelingelenin’ireo sambo mpanjono indostrialy.