Toekarena

Fihaonambe ara-toekaren’ny Oseana Indiana Hisokatra amin’ny kaontinanta afrikanina

Toekarena
Alarobia 26 Septambra 2018

Hotanterahina etsy amin’ny village Voara Andohatapenaka manomboka anio ny fihaonambe ara-toekaren’ny nosy manodidina ny Oseana Indiana andiany faha-11.

Hampiavaka ity andiany manaraka ity ny fisokafana sy ny fiaraha-miasa ataon’ny mpandraharaha ny oseana Indiana amin’ny kaontinanta afrikanina. Fantatra fa maro be ireo sehatra mbola azo trandrahana ary anaovana fandraharahana eto Afrika ka ilaina ny fiaraha-miasa amin’ny firenena afrikanina. 150 mahery eo ny mpisehatra avy amin’ny fanjakana sy ny tsy miankina ho avy ao amin’io foara haharitra 3 andro io. Hisy ny fandinihana ny olana sedrain’ny mpandraharaha eo amin’ny fampandrosoana ny orinasany amin’ny lafiny maro. Hampiarahina amin’ity fihaonambe ara-toekarena ity ihany koa ny fampirantiana famoronana Voatra andiany faha-5 (salon de la créativité Voatra) izay karakarain’ny tranoben’ny Varotra sy Indostria isan-taona hampisehoana ny fahaizan’ny mpandraharaha Malagasy. Ankoatra izay moa dia hisy hatrany ny atrikasa mandritra ny 3 andro hanatsarana ny tontolon’ny fandraharahana ary hifampizarana traikefa hanamafisana orina ny fiaraha-miasan’ny Nosy eto amin’ny oseana Indiana sy ny kaontinanta afrikanina.

Tsirinasolo