FIEF-MADA

SY NY FARIBOLANA SANDRATRA

Toekarena
Alarobia 10 Jona 2026

Tsy mahasolo ny boky ny internet sy ny Facebook

Tsy mahasolo ny haren-tsaina sy ny fahalalana azo avy amin'ny famakiana boky ny fikirakirana internet sy ny filalaovana tsy mitsahatra ao anaty tambajotran-tserasera Facebook ho an'ny FIEF-MADA na ny Fifankatiavana sy ezaka fampandrosoana an'i Madagasikara tarihin-dRaharijaona Jean François filohany sy ny Faribolana Sandratra miaraka amin-dRtoa Felaniaina mpanoratra. Ny teny sy ny kolontsaina ao aminy mantsy no maha-firenena ny firenena iray raha ny nambaran'izy ireo hatrany ka tokony hanaovan'ny Fitondram-panjakana ezaka. Tsy ampy intsony hoy ny filohan'ny FIEF-MADA ny fanentanana ny olona mba hamaky boky. Tsy mañana fahafahana ny hividy boky intsony ny ankamaroan'ny tokantrano Malagasy hoy izy vokatry ny halafosan'izy ireny. Sos-kevitra narosony araka izany ny hisian'ny tetikasa trano famakiam-boky manakaiky vahoaka. Miara-mankalaza ny iray volan'ny teny Malagasy ny FIEF-MADA sy ny Faribolana Sandratra izay marihina mandritra ity volana Jona ity. Misy ny hetsika tanterahin'izy ireo mandritra ny 5 andro eto an-drenivohitra. Nanomboka omaly Talata 09 Jona ny hetsika ahitana velan-kevitra, fifampizarana momba ny teny sy ny kolontsaina Malagasy ka tsy ho diso anjara amin'izany ny tanora mpianatra.
Pati
Légende : Rtoa Raveloniaina Felana ankavanana hotronin-dRaharijaona Jean François ankavia !