Toekarena

Fiara “Karenjy” Mihamitombo ny famokarana

Toekarena
Alakamisy 14 Septambra 2017

Manomboka miroborobo ny indostria fanamboarana fiarakodia eto amintsika amin’ny alalan’ny “Karenjy” any Fianarantsoa.

Mihatsara ny kalitaon’ny vokatra ary mitombo ny famokarana satria miakatra ny kaomandy. Efa nivoaka ny Mazana I sy ny Mazana II, fiara tsy mataho-dalana mifanaraka amin’ny toe-tany eto Madagasikara, ary sokajiana ho mafy sy matanjaka, ary tsy mena-mitaha amin’ny fiara avy any ivelany eo amin’izay lafiny izay. Efa misy vitsivitsy mivezivezy eny an-dalambe eny, izay azo hitarafana fa misy ny ezaka sy finiavana hizotra mankany amin’ny tsara hatrany, ary mampisongadina sy manandratra ilay hoe: “Vita Malagasy”. Reharehan’ny Malagasy ny fananana orinasa toy ny Karenjy, saingy mba manana finiavana hanampy sy hanosika ireny ve isika ? Toa vitsy amin’ireo mpitondra ambony na mpanambola no liana sy manolotena hividy azy ireny satria efa sodokan’ny avy any ivelany, saingy raha mbola izay foana no toe-tsaina hoentina, dia tsy hivoatra ny orinasa tahaka itony fa mety hidaraboka indray aza. Fahita eto amintsika rahateo ny hoe : ny vahiny no liana sy mividy ireny vokatra vitan’ny Malagasy ireny, fa isika indray no mialangalana sy manao valalan’amboa, hoy ny fitenenana.

Toky R