Toekarena

Fiaingan’ny toekarena Malagasy Ilaina ny fampandrosoana ny faritra

Toekarena
Zoma 13 Aprily 2018

Ankoatra ny fitoniana ara-politika dradradradraina mandrakariva dia antoky ny fiaingan’ny toekarena ny fampandrosoana ny faritra.

Tsy mandeha ny toekaren’ i Madagasikara raha tsy mandroso ny faritra tsirairay misy ao aminy. Iaraha-mahalala fa mitodika betsaka any amin’ny fambolena ny Malagasy ka tokony jerena akaiky ny faritra rehetra izay saika misy hatrany io sehatra io eto. Io ilay lazaina hoe fampandrosoana ny tontolo ambanivohitra. Ankoatr’izay dia ampandrosona ny faritra amin’ny alalan’ny fitrandrahana ny zavatra ananany tombony sy betsaka ao aminy. Raha faritra manana lavanila na misy harena an-kibon’ny tany ohatra dia miainga amin’izany ny fampandrosoana atao. Hitondra fanatsarana ny fari-piainan’ny isam-batan’olona izany rehetra izany. Fa ilaina ihany koa ny fanabeazana izay tena latsaka ambany eto amintsika. Tokony hisy politikam-pampianarana maty paika miainga eny amin’ny faritra rehetra indrindra ny eny ambanivohitra izay kitoatoa tanteraka ny fampianarana. Hampiakatra ny fananana olona afaka manao zavatra tsara sy tsy mora ambakaina izany. Rehefa izay dia handroso ny faritra tsirairay ary hiainga amin’izay ny toekarenan’i Madagasikara.

Tsiry