Toekarena

Faritra Anosy Manana ny harena mampiavaka azy

Toekarena
Talata 08 Mey 2018

Na dia lavitra sy ratsy lalana aza ny faritra Anosy dia manan-javatra maro hitondra fampandrosoana any ifotony sy fampiroboroboana ara-toekarena. Betsaka ireo vokatra azo trandrahana tsara ary azo aondrana any ivelany.

Anisan’izany ny fananany taretra sy rofia izay ahafahana manamboatra harona sy zavatra maro atao amin’ny tanana. Mampiavaka ity faritra ity ihany koa ny fananany voankazo maro mandavan-taona tahaka ny akondro, goavy, papay ary ny manga. Ireny no ahodina ho lasa “confiture” ary mamatsy ireo toerana maro. Mamokatra hatrany amin’ny 200 kilao isan-kerinandro ny koperativa mpikambana mpanodina ny voankazo izay mivondrona ao amin’ny ONG CARA (Centre d’Affaires Régional Androy) tahaka ny Tsaralaza, Taratra, Tatsimo. Ankoatra ireo mpizahatany manjifa ny asa tanana dia mandray tsy tapaka ny vokatra ihany koa ireo hotely lehibe manodidina any. Ankoatra izay, anisan’ny tena mampiavaka ity faritra ity ny fananany dipoavatra sauvage be dia be. Mamokatra hatrany amin’ny 50 taonina ireo toerana tahaka an’i Manambaro, Ampasy, Ranomafana. Ireo mpandraharaha mpanondrana entana indray kosa no tena manjifa eny ifotony ity dipoavatra ity. Tena mahavelona ny mponina ny asa tanana sy ny fambolena atao any saingy mahaketraka azy ireo sy ny mpandraharaha mpanjifa ny tsy fandraisan’andraikitra amin’ny faharatsian’ny lalana. Olana ihany koa ny tsy fananana tsena eto Antananarivo, hany ka mianina fotsiny amin’izay olona tonga any an-toerana ireo mponina.

Tsiry