Toekarena

Fandaharan’asa FEC faha-5 Nankatoavin’ny FMI

Toekarena
Talata 11 Jona 2019

Nanomboka tamin’ny 28 mey lasa teo ny fijerena ny tomban’ezaka andiany fahadimy nataon’i Madagasikara amin’ny fandaharan’asa Facilité Elargie de Crédit (FEC).

Lavorary ary nizotra tamim-pilaminana izany, araka ny tatitry ny minisitry ny toekarena sy ny fitantanam-bola, Richard Randriamandranto tetsy amin’ny Banky Foiben’i Madagasikara omaly. Mbola hisy mihitsy aza atsy ho atsy ny FEC faha-6 noho ny fahatokisan’ny Tahirim-bola Iraisam-pirenena an’i Madagasikara, hoy izy. Nanambara ny teo anivon’ny FMI fa mihatsara ny toekarena Malagasy nanomboka tamin’ny fahazoana ny tahan’ny fitomboana ara-toekarena ho 5,2% noho ny ezaka natao tamin’ny fambolena sy ny fandraharahana. Ankoatra izay, nanainga ny toekarena ihany koa ny fanondranana lavanila sy ireo vokatry ny harena ankibon’ny tany, hoy izy ireo. Voalanjalanja ny tahan’ny sondro-bidim-piainana satria voatazona ho 6,1% tamin’ny faran’ny taona 2018. Nambaran’izy ireo fa ilaina ny ezaka amin’ny fampidiram-bolan’ny fanjakana sy ny mahakasika ny fanjakana tsara tantana, indrindra ny olana mahakasika ny vidin-tsolika. Tokony harahina an-tsakany sy an-davany ny fitsitsiana natao ao amin’ny lalàn’ny tetibolam-panjakana nasiam-panitsiana ary ankasitrahana ny ezaka hatao amin’ny sehatra fanabeazana, fahasalamana ary fotodrafitrasa.

Tsirinasolo