Toekarena

Partagé sur :
• facebook

Raha fandeferana sy vahaolana no nandrasana tamin’ny fanjakana manoloana ny raharaha AAA-Tiko, dia vao mainka ny nifanohitra tamin’izany no setriny omaly.

Fihantsiana sy fanamparam-pahefana no nataon’ny fanjakana HVM, ka tsy nampihetsi-bolomaso ny azy ireo akory ny fisian’ny fahafatesan’ny omby tao an-toerana. Nanamafy ny fanidiana tanteraka ny orinasa indray mantsy ny fitondram-panjakana ao Antsirabe ny Alarobia 7 marsa 2018 teo. Nidina vao maraim-be tany an-toerana ny vadin-tany niaraka tamin’ny fitaovana fanaovana “soudure”, ka nametraka takelaka mamaritra ny didim-pitondrana iraisan’ny minisitera laharana 24.392/2017 ny  4 oktobra 2017. Antony raha ny fanazavana nomen’ny vadin-tany, Maitre Lisiharilala dia baikon’ny Prefen’Antsirabe no naniraka azy ireo fanindiminy, hanamafy hatrany ny fanidiana efa natao teo aloha, izay natao tamin’ny taratasy moa izany. Varavarana 16 tamin’ireo nohidiana 22 moa no azo nopetahana ilay “soudure”, satria ny hafa dia hazo sy alimo ka mety hiteraka fahasimbana na mirehitra. Taorian’io dia nanamarina ny fisian’ilay omby maty ny vadin-tany dia niroso tamin’ny fandorana izany ny tompon’andraikitry ny toeram-piompiana satria efa nanomboka ho maimbo ilay fatin’omby. Tokony nisy ihany koa ny fitsarana ady maika momba ny tokony hamahana haingana ny vavahady hahafaha-mikarakara ireo omby, saingy rahampitso zoma indray izany noho ny tsy maha tao an-toerana ny Prefen’Antsirabe. Miha reraka hatrany anefa ireo omby, ka tsy hay na hisy ho faty na ahoana? Etsy andaniny, dia mandeha ny fihazana ireo vokatry ny AAA-Tiko sisa tavela eny amin’ny mpivarotra amin’izao fotoana izao.

Toky R sy Caius R

Tia Tanindrazana

Samia mijoro ho an'i Gasikara.