Toekarena

Partagé sur :
• facebook

Mbola mampiseho ny fahavononany hiatrika ny fifidianana ben’ny tanànan’Ampitatafika sy ny mpanolotsaina, i Rado Ramparaoelina.

Hahafahana miatrika izany, dia manohy ny fifanatonana eo amin’ny fokonolona ny kaominina sady manatsara hatrany ny fomba fiasa eo anivon’ny kaominina Ampitatafika ihany koa. Ny 90%-n’ireo programan’asa dia efa voavolavola avokoa. Matetika olana mipetraka  ny fiaraha-miasa eo amin’ny fanjakana foibe sy ny ben’ny tanàna hafa firehana. Nahitsy ny tenin’i Rado Ramparaoelina, ben’ny tanàna avy amin’ny antoko Tiako I Madagasikara fa ezahina ny fifanatonana satria tokana ny tanjona  dia ny fampandrosoana. Tsy misy firenena afaka mandroso raha tsy mandroso ny kaominina ao aminy, hoy izy. Notsipihany hatrany fa tsy atao sakana ny loko politika  ary tsy azo ekena raha izany no hatao fanilikilihana. Ny kaominina Ampitatafika rahateo dia tsy mbola nanidy varavarana tamin’izany fa nisokatra foana. Nomarihany fa izay antoko tonga teo dia efa niara-niasa taminy avokoa.  Eo amin’ny lafiny sosialy, tsy maintsy atao “béton” na “pave” na tara ireo tokotanin’ireo EPP. Hatao fanamby ihany koa ny fanamboarana ny lalana Ambohitsakalava, izay mirefy 2km saingy tena ratsy be. Eo amin’ny fahasalamana, hiezaka hitady fiaraha-miasa any ivelany amin’ny resaka fiara fitaterana marary ny kaominina. Ny tsy fandriampahalemana indray dia hohatevenina  ny jiro an-dalambe ary ny tena zava-dehibe dia ho lasa borigady manokana ny zandarimaria eny Ampitatafika fa hisaraka amin’ny borigady Fenoarivo izay efa nankatoavin’ny minisiteran’ny fiarovam-pirenena sy ny SEG.

Marigny A. sy Pati

Tia Tanindrazana

Samia mijoro ho an'i Gasikara.