Toekarena

Fampandrosoana ny maha olona Tratra aoriana i Madagasikara

Toekarena
Zoma 10 Aogositra 2018

Mbola mila ezaka be i Madagasikara raha mijery ny tatitra nasionaly momba ny fampandrosoana ny maha olona (RNDH) eto Madagasikara nataon’ny tetikasan’ny firenena mikambana PNUD.

Mbola tena marefo satria mitana ny laharana faha-155 amin’ny 188 ny firenena Malagasy ny amin’ny fampandrosoana ny maha olona tamin’ny taona 2016. 0,512 ny tondro IDH an’i Madagasikara izay manakaikikaiky ny an’ny firenena farany izay manome 0,497. Ny salanisan’ny firenena mandroso amin’io lafiny io anefa dia efa mahatratra hatramin’ny 0,717. Ny lafiny fahasalamana sy ny fampianarana ary ny vola miditra amin’ny isam-batan’olona no anisan’ny antony mahatonga ny IDH an’ny Malagasy ho ambany. Na eto amin’ny firenena aza moa dia mbola samy hafa ny IDH amin’ny faritra rehetra. Ankoatra ny faritra Analamanga, Itasy, SAVA ary DIANA izay manana IDH eo ho eo ihany dia saika ambany be avokoa ny tahan’ny fampandrosoana ny maha olona any amin’ny faritra hafa. Ny any Ihorombe aza moa dia tena ambany be satria 0,363 monja izay ilana 19 taona be izao vao hahatratra ny tokony ho izy. Mila fandraisan’andraikitra haingana ny amin’izany tahaka ny fijerena hatrany ny maha izy azy ny faritra hiteraka fampandrosoana ifotony ka hiantraika amin’ny isam-batan’olona. Amin’izay dia hisy ny fitovian’ny faritra rehetra mba samy hiroborobo ka hiantraika amin’ny toekarena mihitsy.

Tsirinasolo