Toekarena

Famerenam-bola eny amin’ny banky Sahirana ireo mpanao asa tena

Toekarena
Alatsinainy 18 Mey 2020

Efa tena manomboka mahazo vahana ary mihalalina ny krizy aterak’ireo fepetra tsy maintsy ampiharina nohon’ny aretina coronavirus.

Miha-mitombo hatrany ireo olana sahirana amin’ny famerenam-bola eny amin’ny Banky sy ny orinasa mpampindram-bola madinika ireny, indrindra ny mpanao asa tena. Raha ny teo anivon’ny Orinasa mpampindram-bola madinika APEM-PAIQ (Association pour la Promotion des Entreprises à Madagascar- Programmes d’Appui aux Initiatives des Quartiers) dia nanambara ny tompon’andraikitra ny fitantanana, Rtoa Ravelonarivo Warda Sojnackie fa nihena 60% ny tahan’ny vola miverina tamin’ny Orinasa nohon’ny krizy ara-pahasalamana misy eto Madagasikara. Antony hoy izy ny tsy fandehanan’ ireo asa aman-draharaha amin’ny laoniny intsony. Voakasika mafy amin’izany ireo olona misehatra amin’ny asa madinika izay tena misedra olana ankehitriny. Maro amin’izy ireo no tsy mahatafaverina ara-potoana intsony ny vola tokony aloha ary misy mihitsy aza ny tsy mandoa intsony. Amin’izao fotoana izao dia nanapa-kevitra ny APEM-PAIQ fa haato aloha ny fampindramam-bola amin’izao hamehana ara-pahasalamana izao. Etsy andaniny dia tsy misy ny fakana ny sazy ho an’ireo tsy mahaloa vola ara-potoana izay tsy mahafeno ny vola tokony haloa. Ho an’ireo izay tsy tonga mandoa mihitsy kosa dia misy ny taratasy natao hametrahan’ireo mpanjifa ny fepotoana eritreretina hahafahana mandoa ny trosa.

Tsirinasolo