Toekarena

Fahefa-mividin’ny Malagasy Efa tena latsaka ambany

Toekarena
Alatsinainy 22 Janoary 2018

Mahatsapa ny mpivarotra ankehitriny fa mihen-danja tanteraka ny fahefa-mividin’ny Malagasy. Amin’ny lafiny haingo, ohatra, dia nanambara Ramatoa Manitra sy ireo namany mpivarotra ao amin’ny AVANCE CENTER Behoririka fa tsy misy ny tsena raha oharina ny tamin’ny taona 2017.

Ny janoary tokoa mantsy, hoy izy, no volana fifampiarahabana ho an’ny mpianakavy, mpiara-miasa na mpiara-mivavaka ka ijeren’ny maro ny akanjo sahaza amin’izany. Zara anefa raha misy mividy ankehitriny ny entana amidinay, hoy ihany izy ary ny tena mampalahelo dia misy fotoana tsy mahalafo na dia iray aza izahay mandritra ny herinandro nefa izahay tsy manondrotra vidin’entana. Ny hofan-trano anefa tsy maintsy aloha amin’ny sinoa ary misy sazy amboniny raha sendra tara ny fandoavana izany. 500 000 Ariary hatramin’ny 1 000 000 Ariary ny hofan-trano ao amin’ny Avance Center amin’ny ankapobeny. Manoloana izany dia misy fotoana izahay mamono antoka mihitsy na mandefa masonkarena rehefa teren’ny tsy fisian’ny tsena toy izany, hoy ihany ireto mpivarotra ireto. Efa mipaka amin’ny ankamaroan’ny tokantrano Malagasy ity fahefa-mividy latsaka ambany dia ambany ity ary taratry ny tsy fahaiza-manaon’ny mpitondra ankehitriny.

Tsiry