Toekarena

Fadin-tseranana 600 miliara Ariary no very tanatin’ny 3 taona

Toekarena
Alatsinainy 12 Aogositra 2019

600 miliara Ariary ny vola very teny amin’ny fadin-tseranana tao anatin’ny 3 taona noho ny kolikoly sy ny halatra maro, hoy ny praiminisitra Ntsay Christian nandritra ny famoahana ny Inspecteurs de douanes miisa 30 mianadahy tamin’ny faran’ny herinandro teo.

Matetika dia halaim-panahy ny ankamaroan’ny mpiasa misehatra eny amin’ny fadin-tseranana ary nanambara mihitsy ny minisitry ny toekarena sy ny tetibola, Richard Randriamandranto fa ho hentitra ary misy ny sazy henjana mifanaraka amin’ny lalàna amin’ireo izay mbola tratra manao kolikoly. Saropady ny andraikitra iantsorohan’ny Inspecteur de douanes ary ny ankamaroan’ny maro manao fifaninanana hiditra amin’izany aza dia mieritreritra sahady ny vola be azo amin’izay mety ho fangalarana sy fanaovana kolikoly. Tsy mora ny andraikitra miandry ary maro ny sedra sy ny famandrihana ary ireo fakam-panahy maro hahazo ireo mpiasa vaovao ireo saingy azo toherina izany rehefa ao ny fitiavana ny tanindrazana.

Tsirinasolo