Toekarena

Entona fandrehitra Naidina 5% ny TVA, 9% ho an’ny vidin’ny tavoahangy

Toekarena
Alarobia 18 Novambra 2020

Tontosa ny 16 novambra ny dinika teo amin’ireo mpandraharaha mivondrona

anatin’ny Comité Malgache du Butane sy ny Minisiteran’ny Tontolo iainana sy ny Fampandrosoana Lovain-jafy (MEDD) mahakasika ny fampidinana ny hetra amin’ny fanafarana sy ny fivarotana ny “butane” eto Madagasikara. Ny tanjona fototra amin’izany dia ny ahafahan’ny tokatrano malagasy manjifa ity angovo madio ity ary hampihena ny fanimbana ny ala noho ny fampiasana ny arina sy ny kitay. Rehefa nodinihana ny fiakaran’ny vidin’ny arina amin’izao fotoana izao, dia mora kokoa ny gaz. Etsy andaniny anefa dia mampihena ny fahalotoan’ny rivotra ihany koa ny fampiasan’ny isan-tokatrano ny gaz. Tapaka ary fa hidina ho 5% ny TVA amin’ny “gaz” raha 20% izany teo aloha, ny vidin’ny tavoahangy iray amin’ny “gaz” dia hidina 9% ary ireo kojakoja miaraka aminy ho lasa 20 000 ariary raha 105 000 ariary teo aloha. Dingana lehibe izao mba hizorantsika miala amin’ny fampiasana ny arina sy kitay mankany amin’ny angovo madio. Maro ireo angovo azo asolo ny kitay sy ny arina, anjarantsika kosa no mampiroborobo azy ireny mba hanafoanantsika ny fanimbana ny ala ka hahatonga an’i Madagasikara ho maitso indray, hoy ny avy amin’ny MEDD.

Toky R