Toekarena

Boriborintany faha-3 Azo hivarotana ireo sisin-dalana malalaka

Toekarena
Sabotsy 06 Mey 2017

Mitohy ny asa fanadiovana sy fandaminana eo anivon�ny boriborintany faha-3. Laharam-pahamehana amin�izany ny fanamboaran-dalana sy ny fanatsarana ny tsena fivarotana ao anatin�ireo fokontany 34 mandrafitra ny distrika fahatelo.

Ezaka ankehitriny, ohatra, ny fanomezana endrika vaovao ny tsena «Etal» eny Andravoahangy. Efa tontosa hatrany amin’ny 60% moa ity asa fiaraha-miombon’antoka eo amin’ny mpitantana ny boriborintany sy ireo mpivarotra eny an-toerana ity. Tsy ampy anefa ny fotodrafitrasa manoloana ny fahantrana lalim-paka mianjady amin’ny mpiara-belona izay mirotsaka mivarotra avokoa, hoy ny delege Andriamamonjisoa Rado. Iaraha-mahalala ihany koa ny fifanenjehana tsy misy fiafarana eo amin’ny polisy monisipaly sy ireo mpiavotra ankalamanjana. Antony nahatonga ny fiadidiana ny boriborintany faha-3 hanome alalana tsy ho ela ny fivarotana amin’ireo sisin-dalana malalaka. Fepetra takiana amin’ireo mpivarotra kosa anefa ny fanadiovana, ny filaminana ary ny fandoavan-ketra ara-dalàna ny faritra ivarotana, araka ny fanampim-panazavan’ity tompon’andraikitra voalohany ao amin’ny boriborintany faha-3 ity.

Ramano F.