Toekarena

Amboanana-Arivonimamo Nanolo-tanana amin�ny famatsian-drano ny Amerikanina

Toekarena
Sabotsy 15 Aprily 2017

Nahazo rano fisotro madio ny fokontany Alarobia kely sy Ambohimanambola samy ao amin�ny kaominina Amboanana Distrikan�Arivonimamo.

Fotodrafitrasa azo tamin’ny alalan’ny fiaraha-miasan’ny kaominina sy ny misionera amerikanina, manatanteraka asa sosialy sy fampandrosoana eto Madagasikara izy ity. Araka ny nambaran’ny Ben’ny tanàna dia anisan’ireo fokontany mijaly rano teo anivon’ny Kaominina Amboanana ireto Fokotany roa ireto, nefa ankehitriny dia samy nahazo paompin-drano iray avy, miampy efitrano fidiovana miisa telo ho an’ny EPP Ambohimanambola. Loharano avy eny an-tendrombohitra no notarihina hatoby ao amin’ny siniben-drano, ary io indray no mamatsy ny paompin-drano. Mitentina 240 tapitrisa Ariary ny tentim-bidin’ny fanamboarana, ka ny 10% tamin’io dia finiavana avy amin’ny mponina mpahazo tombontsoa. Malagasy an-tapitrisany eny anivon’ny kaominina sy ny fokontany ambanivohitra no mbola mivelona amin’ny rano tsy azo antoka raha ny nambaran’ny solombavambahoaka Rakotomanjato Rodin, voafidy tao amin’ny Distrikan’Arivonimamo, ka anaovan’ity farany antso avo amin’ny fitondram-panjakana sy ny tompon’andraikitra voakasika ny hamahana olana.