Toekarena

Ady amin’ny halatra ao amin’ny ladoany 34 mianadahy no nanasonia fianianana

Toekarena
Zoma 10 Novambra 2017

Naseho ampahibemaso tetsy amin’ny hotely Colbert Antaninarenina omaly ireo 34 mianadahy izay hisahana manokana amin’ny ady atao amin’ireo karazan-kalatra rehetra mitranga ao amin’ny fadintseranana manerana ny nosintsika ao.

Araka ny fanazavana, dia rafitra mipetraka isan-taona eo anivon’ny ladoany izy ity ary ny fahatrarana izay halatra rehetra misy eny amin’ny fadintseranana no tanjona aminy. Maherin’ny 53 lavitrisa ariary ny tombony (surplus) voaray tamin’ny vola niditra ivelan’ny solika raha ny tao amin’ny seranan-tsambon’i Toamasina manokana. Nidina 50% ihany koa ny fotoana famoahana entana ao amin’ity seranana ity ary niakatra 300% ny fiakaran’ny tahan’ny fampidiran-ketra. Mandra-pifaran’izao 2 volana tsy hifaranan’ny taona 2018 izao kosa dia andrasana hampiditra maherin’ny 20 lavitrisa ariary ao anatin’ny kitapom-bolan’ny ladoany ity sampan-draharaha manokana ity.

J. Mirija