Sport

Partagé sur :
• facebook

Efa nisy manasa-dalana tokana ho an’ny sokajy vehivavy tontosa omaly, lalao izay adin’ny samy Malagasy

. Karazan’ny famerenana ny famaranan’ny fiadiana ny tompondakan’i Madagasikara natao tany Fianarantsoa volana vitsy lasa ihany izy ity. Lalao izay nifandonan’ny Stef’Auto tompondakan’i Madagasikara sy ny AMVB tompondaka lefitra. Noporofoin’ny ekipan’Atsinanana ny maha tompondaka azy im-pito nisesy. Lavon-dry Rose de Lima mazava tamin’ny seta 3-0 indray mantsy ny ekipa tompondakan’Analamanga. Mikasika ireo vokatra hafa omaly teny amin’ny lapan’ny fanatanajahantena, niatrika ny lalaony farany ny GNVB izay tsy resy mihitsy tao amin’ny vondrona nisy azy ka ny Racines Club kaomaorianina indray no nomeny ny anjarany. Nomontsanin-dry Andry sy Zo tamin’ny seta 3-0. Efa toy ny fanazarantena fotsiny sisa io lalao io ho an’ny zandary. Anisan’ny lalao omaly koa ho an’ny lehilahy ny nandavoan’ny Beau Vallon avy any Seisela an’ny Camp Ithier Maorisianina tamin’ny seta 3-0. Efa niady lah-5 koa omaly ny sokajy vehivavy ka ny Cascade avy any Seisela nampiondrika an’ny ASI, ekipa malagasy fah-3 tamin’ny seta 3-0. Hanamarika ny andro anio ireo lalao manasa-dalana telo ambiny eny amin’ny lapan’ny fanatanjahantena Mahamasina. Hifandona amin’ny ankatoky ny famaranana faharoa ho an’ny vehivavy ny lalao hifanandrinan’ny Anse Royalke avy any Seisela sy ny Azur Maorisianina. Aorian’io ireo manasa-dalan’ny lehilahy, ny Beau Vallon hifampitana amin’ny Trou Aub Biches Sharks Maorisianina ary ny GNVB kosa hifanandrina amin’ny ASI, izay lalao famerenana ny famaranan’ny fiadiana ny tompondakan’i Madagasikara farany teo. Hanala vela izany amin’io ny Akany Sambatra Itaosy. Ho fantatra rahariva avokoa izany ireo ekipa rehetra hahazo ny tapakilan’ny famaranana hatao ny sabotsy.

Rasanda Serge

Tia Tanindrazana

Samia mijoro ho an'i Gasikara.