Sport

Volley-Ball Analamanga Lany ho filoha i Raharimalala Léa

Sport
Alatsinainy 25 Febroary 2019

Tontosa tamin’ny sabotsy 23 febroary 2019 teo teny amin’ny LTC Ampefiloha ny AGE an’ny ligin’ny taranja volley-ball eto Analamanga. Taorian’ny tatitra nataon’ny filoha teo aloha Rasamison Hajaniriana ka nahazoany “Quitus”

tamin’ireo klioba tonga nivory dia nirosoana avy hatrany ny fifidianana ny filoha mpitantanana vaovao ao amin’ity ligy ity ka nifanandrinan’io filoha teo aloha io sy Rtoa Raharimalala Léa. Lany tamin’ny isam-bato 10 noho 5 tamin’ireo klioba 15 nandray anjara tamin’ny fifidianana ity farany, izay tsy zoviana amin’ny maro intsony eo amin’ity sehatry ny volley-ball ity. Nanoritsoritra avy hatrany izy fa hanohy ny zava-bitan’ireo nodimbiasany teo aloha ny ekipa tarihany. Vaindohan-draharaha voalohany ho tanterahan’ny ligy vaovao tarihako, hoy izy, ny fampisongadinana ny tanora ao amin’ity taranja ity ka hampandraisana anjara amin’ny lalao iraisam-pirenena izy ireo manomboka eto. Izany dia hatao ao anatin’ny fitantanana mangarahara , hoy ihany ity filoha vaovao ity, ary ilaina koa ny hananganana ny “beach volley” eto Analamanga. Tapaky ny rehetra fa amin’ny faha-09 martsa 2019 no hanatanterahana ny AG voalohany an’ity ligin’ny volley-ball vaovao ity sy hanaovana ny famindram-pahefana eo amin’ireo filoha nifandimby.

Ntsoavina Evariste