Sport

Vahiny Karate-do Tiorka Nihaona tamin’ireo mpikatroka Malagasy

Sport
Alakamisy 23 Mey 2019

Fitsidihana ara-pomba fifanajana teny anivon’ny minisiteran’ny tanora sy fanatanjahantena teny Andohan’Analakely no natrehan’ireo vahiny mpanao karate Tiorka notarihan’Atoa Esat Delihasan ny marainan’ny omaly alarobia 22 mey 2019.

Notohizana tamin’ny fanatanterahana dinika teknika teny Mahamasina izany avy eo. Fihaonana mivantana sy fampitana hafatra tamin’ireo mpikatroka karate-do Malagasy marobe tetsy amin’ny Lapan’ny fanatanjahantena Mahamasina no nanohizan-dry zareo izany ny tolakandron’io omaly alarobia io.. Nisaotra manokana amin’ny fandraisana mahafinaritra sy mahafa-po nataon’ny Malagasy azy ireo izy ka nanome toky ny hampita araka izay tratran’izy ireo ny traikefa ananany. Nisaoran’ny filohan’ny FMK, Andrianavomanana Solofo Barijaona, manokana kosa tetsy an-kilany ny ambasadaoron’i Torkia eto Madagasikara sy ny minisitry ny fanatanjahantena Malagasy nanana tsirin-kevitra ny hanafarana an’ireto manampahaizana Tiorka ireto izay tena sangany tokoa eo amin’ny taranja karate eran-tany ankehitriny ka mila hararaotina tsara ny maka traikefa aminy. Mbola hisy ny fifanaovan-tsonia fiaraha-miasa hatao etsy amin’ny Minjs eo amin’ny karate-do Tiorka sy karate-do Malagasy fa anio alakamisy aloha dia hisy ny fampiofanana teknika sy ara-pitsarana lalao hiarahan’ny mpanao karate Malagasy ao amin’ny Lapan’ny fanatanjahantena Mahamasina.

Ntsoavina Evariste