Sport

Partagé sur :
• facebook

Hiditra amin’ny “Grande Finale” ankehitirny ny hetsika karakarain’ny PIF na ny “Pétanque Inter-fokontany” ao Antsirabe ny 23-24 desambra 2017 izao.

Roa taona no nijoroan’ity fikambanana manetsika ny tsipy kanetibe ao Antsirabe ity ka efa nahavita fifaninana goavana in-droa miantoana izy ireo. Raha ny nambaran’Atoa Rafeliarisoa Manjatonirina, filohan’ny P.I.F dia fitrandrahana ireo mpilalao eny anivon’ny fokontany no tanjona amin’ny fifaninanana Inter-fokontany. Loka goavana no hozaraina amin’ity “Grande Finale” izay mahatratra iray tapitrisa Ariary. Nahatratra ekipa 70 ny nandray anjara tamin’ny fifanintsanana. Raha ny fanazavany hatrany dia misy ny fiaraha-miasan’izy ireo matotra miaraka amin’ny Ligin’ny tsipy kanetibe Vakinankaratra. Taranja anisan’ny mampalaza an’i Vakinankaratra, indrindra i Betafo sy Antsirabe ny tsipy kanetibe. Tsy tongatonga ho azy izany fa anisan’ny manandratra ny taranja ny eny anivon’ny fokontany ka anisany ny fikambanana “Pétanque Inter-fokontany”, izay niofo ho “Pétanque In Fair Play” amin’izao fotoana.  Notsiahiviny fa ireo ekipa rehetra nahazo ny amboara goavana iraisam-pirenena farany teo dia saika novolavolain’ny fikambanana avy tamin’ireo fifanintsanana nomanin’izy ireo no nanomanan’izy ireo tena nialoha ny nivoahan’izy ireo tany ivelany. Misedra olana goavana ity taranja ity ankehitriny satria tsy manana kianja hilalaovana intsony ireo tanoran’Antsirabe fa efa nanorenan’ny tompony fotodrafitrasa ny kianjan’ny Karmaly, izay nilalaovana hatramin’izay. Ao amin’ny Star sy ny CFAMA no misy kianja filalaovana saingy andoavam-bola isaky ny misy fifaninanana atao, ka tsy zakan’ny mpikarakara ny hofany.

Caius R.

Tia Tanindrazana

Samia mijoro ho an'i Gasikara.