Sport

Tsipy kanetibe Malagasy Hanomboka anio ny « Championnat de Mada 2019 Doublette Mixte »

Sport
Sabotsy 26 Janoary 2019

In-3 miantoana dia ny 26-27 janoary 2019 sy ny 16-17 febroary 2019 ary ny 09-10 martsa 2019 no hanatanterahana etsy amin’ny boulodrôme Paddock sy Cbt Mahamasina ny fifaninanana tsipy kanetibe fiadiana ny ho tompondakan’i Madagasikara « doublette mixte » 2019.

Ekipa 8 isaky ny dingana roa voalohany no hiatrika ny « Grande finale » hotanterahina ny 09-10 martsa ka izay ekipa tompondaka eo no hhisolotena an’i Madagasikara any amin’ny fiadiana ny ho tompondaka eran-tany 2019 hotontosaina any Espagne. Marihana fa natokana ho an’ireo mpilalao manana « licence » ara-dalàna ity fifaninanana ity ary isak’ireo dingana telo ireo dia hahazo amboara lehibe 2 hatrany miampy lelavola 2.000.000 ar sy Smartphones orange 2 ary loka maro samihafa koa izay tafavoaka mpandresy. Ny mitana ny laharana faharoa kosa dia hahazo amboara 2 ihany koa miampy lelavola 1.000.000 ar sy smartphone orange 2 ary loka samihafa ihany koa. Ireo ekipa mitana ny laharana faha-3 sy faha-4 kosa dia hotolorana medaly 2 miampy lelavola 50.000 ar sy clé Usb orange 2 ary loka maro samihafa ihany koa. Marihina fa handoavan’ireo mpifaninana « mise » 20.000 ar hatrany ny fifaninanana izay hatrehany. Mba hisorohana ny fiavian’ny orana mety hampitsahatra ny lalao dia hatomboka amin’ny 9 ora maraina hatrany ny fifaninanana rehetra.

Ntsoavina Evariste