Sport

Tournoi Foot à 11 Ftmtk Ekar Ambohimasina Lasan’ny Lycée Privée La Source ny amboara

Sport
Alarobia 18 Jolay 2018

Tontosa tao amin’ny EKAR Ambohimasina Betafo ny alahady 15 jolay 2018 teo ny lalao famaranana baolina kitra « Tournoi Foot à 11 » sokajy vehivavy nokarakarain’ny Tanora ao amin’ny FTMTK EKAR DISTRIKA Ambohimasina.

Lasan’ny mpianatra tao amin’ny Lycée Privée La Source nandresy 3-1 an-dry zareo Sekoly Katolika Ambohimasina ny amboara lehibe niampy « maillots complet » tamin’izany raha ondry kosa no natolotra ny laharana faharoa ary baolina filalaovana kosa no nomena ny ekipa laharana faha-3 dia ny mpianatry ny kaominina Manohisoa. Tonga tany an-toerana nanolotra an’ireo loka ireo ny filohan’ny FIBEMIH « Fikambanan’i Betafo Miray Hina », Atoa Ratiariniaina Jean Theobert na Ra-THEO FIBEMIH ary avy eo mbola nidina tany amin’ny fokontanin’i Soaverana kaominin’Ambohimasina koa ny tenany nanatitra « maillots complet » ho an’ny ekipan’ny fokontany ao amin’ity tanàna ity izay ao anatin’ny fanatanterahana fifaninanana koa amin’izao fotoana izao. Novoizina hatrany tao anatin’ireo hetsika ireo ny filamatry ny Fibemih : « Jereo ny ankehitriny, banjino ny ho avy : tsara ny mivoatra! ».

Ntsoavina Evariste