Sport

Tompondaka nasionaly Basikety N1 A 2017 Nody any Boeny avokoa ny amboara lahy sy vavy

Sport
Alatsinainy 11 Desambra 2017

Noporofoin’ny mpilalaon’i Boeny ny maha sangany azy ireo eo amin’ny taranja basikety baolina.

Norombahin’izy avokoa ny amboaran’ny tompondakan’i Madagasikara miverina na teo amin’ny sokajy lehilahy na teo amin’ny sokajy vehivavy. Omaly alahady 10 desambra 2017 tao amin’ny Lapan’ny fanatanjahantena Mahamasina dia lavon’ny Sbbc Mahajanga tamin’ny 71-63 ny ekipan’ny Mb2All Analamanga teo amin’ny lalao famaranana sokajy vehivavy. Teo amin’ny sokajy lehilahy kosa dia resin’ny Ascb Boeny 71-65 ny Sbbc Boeny. Ankoatra ny amboara azon’izy ireo dia notoloran’ny Telma taratasim-bola 2.000.000 ariary tsirairay avy ireo ekipa tompondaka ireo. Ny ekipan’ny Fandrefiala Analamanga no nitana ny laharana fahatelo eo amin’ny vehivavy raha ny ekipan’ny Ascut Atsinanana kosa teo amin’ny lehilahy. Samy voahosotra ho mpilalao mendrika sady mpampidi-baolina be indrindra Raholiarisoa Fanja n° 4 Sbbc Boeny vehivavy (237 pts) sy Randriamampionona Elly n° 25 Ascb Boeny lehilahy (290 pts). Mpampidi-baolina 3 pts be indrindra vehivavy i Mbolatiana Angela Tamifa Amoron’i Mania (28) ary i Donga Stevel Guy Cosfa Analamanga (43). Samy nahazo amboara sy telefaonina Titan Telma avokoa izy ireo (2 ny an’i Fanja sy Elly).

Ntsoavina Evariste