Sport

Partagé sur :
• facebook

Mbola tsy lasa nihazo an’i Hambourg - Allemagne toerana hanatanterahana ny lalao fiadiana ny ho tompondaka eran-tany eo amin’ny taranja “Boxe amateur” ny atleta Malagasy, Andrianarivelo Marco Jérôme, tokony hiatrika izany miaraka amin’ny delegasiona miaraka aminy izay ahitana olona 4.

Tsy mbola navoakan’ny ministry ny tanora sy ny Tale Jeneralin’ny Tafita ny vola tokony hikarakarana ny Visa sy ny saran-dalan’ity delegasiona ity, araka ny fanazavana nomen’ny Federasion’ny ady totohondry Malagasy tetsy Mahamasina omaly. Malahelo amin’ny zava-misy izahay mpitantana an’ity taranja ity, hoy ry zareo omaly, fa mba nanao ezaka goavana be ity taranja ity tamin’ny fazahoana ny “qualification” ahafahana miatrika ity “Mondiaux” any Allemagne ity ny 20 aogositra- 03 septambra na dia efa 8 taona aza tsy nandray anjara tamin’ny fifaninanana iraisam-pirenena ny ady totohondry Malagasy. Na dia niverimberina efa in-20 raha kely indrindra tao amin’ny biaraon’ireto tompon’andraikitra ireto aza izahay, dia fandrirarirana hatrany no setriny ary tena hitsoahan’izy ireo mihitsy aza raha ny marina. Izao indray aza dia voatery nitrosa vola handoavana ny “restauration” nampivondronana an’ireo mpilalao tamin’ny fanomanana ny fiatrehana ny fiadiana ny ho tompondakan’i Afrika farany teo sy ny fanomanan-tenan’i Marco Jérôme sy ireo “sparring-partners” niaraka taminy nanomboka ny 30 jolay farany teo ka hatramin’izao. Manaitra ny sain’ny filoham-pirenena, Rajaonarimampianina Hery sy ny praiministra, Mahafaly Solonandrasana Olivier, izahay ato amin’ny tontolon’ny ady totohondry Malagasy mba hijery akaiky haingana an’ity toe-javatra ity, hoy izy ireo.

Ntsoavina Evariste

Tia Tanindrazana

Samia mijoro ho an'i Gasikara.