Sport

Partagé sur :
• facebook

Nifarana omaly alahady 09 febroary 2020 tao amin’ny “Coupole d’Alger” any Algerie ny fifaninanana fiadiana ny tompondakan’i Afrika eo amin’ny taranja tolona sokajy “cadets”,

“juniors” ary “seniors” sy vehivavy ka nisongadinan’ireo firenena any Maghreb notarihan’i Egypte niaraka tamin’i Nigeria ny fahazoana anaram-boninahitra sy medaly be indrindra.  Ho an’ny solontena Malagasy manokana nahitana mpilalao 3 mianadahy (Randrianatoandro Falihery -65 kg, Rasoanantenaina Emma – 53 kg vehivavy ary Raharison Roma -86 kg  mpila ravinahitra any Frantsa nandray anjara tamin’ny fifaninanana dia ity farany no nibata ny medaly volafotsy teo amin’ny sokajin-danja nisy azy ka voahosotra ho tompondaka lefitra fa irery roa voalohany dia nihintsana tany amin’ny fifanintsanana avokoa. Fantatra fa hiverina an-tanindrazana anio ny delegasiona Malagasy avy any Alger afa-tsy i Manitra Raharison izay hitodi-doha hiverina avy hatrany any Frantsa. Hisaorana be dia be ny Ambasady Malagasy any Alger notarihan’ny “Chargé d’affaire”, Rafalimanana Jeannie, hoy ny filohan’ny Federasiona Malagasy ny taranja Tolona, nandray sy nanotrona hatramin’ny farany an’ireo atletantsika tany Alger ireo.

Marihina fa ireo sokajy nandraisana anjara  tany Alger ireo no hahafahana handefasana atleta Malagasy hiatrika ny “2e qualification olympique Tokyo 2020”  hotanterahina any Maroc amin’ny 9 ka hatramin’ny 15 martsa ho avy izao.

Ntsoavina Evariste

Tia Tanindrazana

Samia mijoro ho an'i Gasikara.