Sport

Tiger Woods mpiangaly “golf” Notoloran’i Trump ny mariboninahitra ambony indrindra

Sport
Alarobia 08 Mey 2019

Nosaloran’ny filoha Amerikanina Donald Trump ny “Médaille de la liberté » tao amin’ny Maison Blanche i Tiger Woods mpiangaly ny taranja « golf »,

telo herinandro taorian’ny nibatany ny fandresena tsy nampino azony, ka nibatany ny amboaran’ny “Masters d’Augusta”. Io “Médaille de la liberté” io no mariboninahitra ambony indrindra azo homena ny sivily any Etazonia. "Ny fahombiazanao nisongadina teo amin’ny tontolon’ny golf, ny fandresenao na eo aza ny fahasahiranana ara-batana, ny fahavononana tsy voahozongozona handresy, handresy, handresy ... ireo toetra ireo dia manamafy sy taratry ny toe-tsaina Amerikanina", hoy i Trump. "Zava-dehibe tsy manam-paharoa ho ahy izao", hoy i Woods namaly, ary nisaotra ireo izay nanohana azy hatrany na tamin’ny tsara na tamin’ny ratsy. Faha-15 amin’ny amboara lehibe azon’i Tiger Woods tao anatin’ny 11 taona iny Masters d’Augusta iny, ary tao anatin’izay dia nisedra fandidiana in’efatra tao amin’ny lamosina, olana ara-panambadiana noho ny fanitsakitsahana ara-tokantrano. Hindrahindraina ho anisan’ny olona malaza indrindra eo amin’ny tontolon’ny fanatanjahantena ity Amerikanina mpiangaly “golf” fanta-daza ity. Any ivelany, homen-boninahitra mendrika azy ny olona manandratra ny lazan’ny fireneny....

Toky R