Sport

Partagé sur :
• facebook

Efa niditra amin’ny fampivondronana fahatelo farany amin’ny fanomanana ny Lalaon’ny Nosy ny taranja tenisy ambony latabatra nanomboka ny alatsinainy teo.

Tsy hijanona intsony izao fampivondronana izao fa hitohy  hatramin’ny fotoana hiaingana hiazo an’i La Reunion izany. Mpilalao folo izay dimy lahy sy dimy vavy no manaraka ny fampivondronana isan’andro etsy amin’ny efitrano kelin’ny lapan’ny fanatanjahantena Mahamasina eo ambany fiahian’ny mpanazatra nasionaly, Razakarisoa Patrick Yves. Marihina fa mpilalao avy eto an-toerana avokoa ireo mpilalao ireo. Mandrafitra ny ekipa lehilahy i Erick, Lino, Dadane, Sitraka, Rado Marcel ary ny ekipa vehivavy kosa ahitana an’i Tiana, Harena, Santatra, Bakoly ary i Andy. Hiompana amin’ny teknika sy taktika ary ny fanohizana ny fanamafisana ara-batana iray volana mahery faran’ny fanomanantena araka ny nambaran’ny mpanazatra nasionaly. Hifandimbiasana amin’ny  badminton sy ny baskety ny fotodrafitrasa hanaovana fampivondronana ka somary mikorontana kely ny fandaharam-potoana. Tsiahivina fa medaly volamena tokana no azontsika malagasy tany Seisela tamin’ny alalan’ilay mpilaravinahitra avy any Frantsa, Jonathan Nativel tamin’ny 2011. Isan’ireo nantsoina ihany ny lehilahy tamin’ity indray mitoraka ity hanatevina ny ekipa malagay saingy namaly tamin’ny fotoana farany fa tsy afaka ho avy noho ny antony arak’asa.

Rasanda Serge

Fanazaran-tena tetsy amin’ny lapan’ny fanatanjahantena

Tia Tanindrazana

Samia mijoro ho an'i Gasikara.