Sport

Partagé sur :
• facebook

Nikarakara “Criterium national” teny amin’ny lapan’ny fanatanajahantena Mahamasina ny federasiona malagasin’ny tenisy ambony latabatra nentina nanavaozana ny filaharana nasionaly isan-tsokajiny.

Fifaninanana an’olon-tokana izy io ho an’ireo mpilalao ao amin’ny 1e serie ka nahatratra 43 ny lehilahy ary 22 ny vehivavy nandray anjara. Ligy 5 no nanana solontena dia Analamanga, Atsinanana, Alaotra Mangoro, Vakinankaratra ary Matsiatra Ambony fa Amoron’i Mania irery no tsy nahatonga mpilalao. Ireo mpilalao 16 voalohany dia nokilasiana tao amin’ny sokajy 1A, ireo 16 manaraka ao amin’ny 1B ary ireo ambiny 2e serie. Lah-1 tamin’ny lehilahy Razafindralambo Zo Nandrianina “Lino” avy amin’ny Jovenna izay nandresy an’Andrianantoandro Sitraka (Galaxy) 3-0 tamin’ny famaranana. Lah-3 i Andriantsarafara Gerald Jovenna izay tsy manaiky mihitsy na dia efa veteran aza. Mpilalao mpirahalahy avy any Antsirabe no lah-4 sy fah-5 dia Rasolomanana Rija Lalaina efa tompondakan’i Madagasikara 2014 sy Rado Marcel. Tsy misy mahozongozona mihitsy kosa fa mbola lah-1 vehivavy hatrany Ratsimbazafy Tiana (Jovenna) izay nandresy an’i Vololonjatovo Mary Lea (Aro) 3-0 tamin’ny famaranana. Lah-3 Rajaonah Rondro (Jovenna), lah-4 Raherinjatovo Santatra (Gecko Sport Moramanga) ary lah-5 Ralaivao Fanantenana (Asa). Ankoatra ny lalaon’ny CJSOI dia anisan’ny fifaninanana iraisam-pirenena banjinin’ny federasiona amin’ity taom-pilalaovana ity ny fiadiana ny tompondakan’i Afrika “senior” hatao any Agadir Maraoka amin’ny volana novambra ary handefa mpilalao 3 lahy sy 3 vavy i Madagasikara amin’io.

Tia Tanindrazana

Samia mijoro ho an'i Gasikara.