Sport

Telma Super Coupe de Madagascar 2017 Lasan’ny CNaPS SPORT ny 2.000.000 ariary

Sport
Alatsinainy 22 Janoary 2018

Lasan’ny CNaPS Sport avy any Itasy ny amboara Telma Super Coupe de Madagascar 2017 eo amin’ny taranja baolina kitra. Resin’izy ireo tamin’ny 1-0 ny sabotsy 20 janoary 2018 teo,

ny Fosa Juniors avy any Boeny teny amin’ny kianjany teny Vontovorona tamin’ny lalao miverin’ny fifaninanana. Baolina matin’i Lucien lahalarana faha-27 teo amin’ny minitra faha-35 no niantoka ny fandresen’ny CNaPS Sport. Nifandanja tsara ny kitikitika nataon’ny roa tonta nandritra ny antsasakadiny taorian’ny niantombohan’ny lalao. Nandeha an’ila koa taorian’io minitra faha-35 io satria nanomboka nanamafy ny fiarovan-tenany ny mpilalaon’ny CNaPS Sport nanomboka teo, indrindra nandritra ny fizaram-potoana faharoa. Nanao fanafihana totoafo ny Fosa Juniors nandritra ity fidirana faharoa ity nefa tsy nahitam-bokany hatramin’ny faran’ny lalao na dia efa nilalao 10 nanomboka teo amin’ny minitra faha-64 nilalaovana aza ny CNaPS Sport noho ny karatra mena azon’i Tojakely irakirany.Voahosotra ho mpilalao mendrik’ity lalao miverina ity na « Homme du match » i Haja Mirija Fortunat Rasoanaivoarison mpilalaon’ny CNaPS Sport ary voahosotra ho mpiandry harato mendrika indrindra kosa i Fanomezantsoa Andriamalala Andoniaina mpiandry haraton’ny CNaPS SPORT ihany izay samy notoloran’ny Telma fanomezana sahaza azy avy.

Ntsoavina Evariste