Sport

«Telma Super Coupe 2017 » eny Vontovorona Hahazo fanomezana ireo mpijery 1.000 tonga voalohany

Sport
Zoma 19 Janoary 2018

Hangotraka ny eny amin’ny kianjan’ny Complexe Culturel et de Loisirs CNaPS Vontovorona hanatanterahana ny lalao miverin’ny “Telma Super Coupe de Madagascar 2017” rahampitso sabotsy 20 janoary.

Hifananadrina amin’izany ny Cnaps Sport Itasy tompondakan’i Madagasikara taona 2017 mpampiantrano sy ny Fosa Juniors Boeny tompon’ny amboaran’i Madagasikara 2017. Hanomboka amin’ny 2ora30 tolakandro ny fihaonana. Mialoha ny fifaninanana dia mbola hisy fampisehoana lehibe hahitana an-dRak Root’s sy Nina’s ary i Firmin sy “invite surprise” manomboka amin’ny 10 ora maraina. Hivoha amin’ny 8 ora ny vavahady. Izay mpijery baolina 1.000 tonga voalohany dia hotoloran’ny Cnaps Sport fanomezana manokana. Nambaran’ny tompon’andraikitra ao amin’ity klioba ity fa efa milamina tsara ny fitaterana izay hiainga eo am-pitan’ny hopitaly Hjra Ampefiloha. 1.000 ariary ny saran-dalana mandroso ary tahaka izay koa ny miverina. Mba ho fitsinjovana manokana an’ireo mpitia baolina Malagasy dia nanamarika ny mpitantana ny Cnaps fa natao ho takatry ny rehetra ny vidim-pidirana ka 3000 ariary eny amin’ny “Gradin” ary 10.000 ariary eny amin’ny “Tribune”.

Ntsoavina Evariste