Sport

Taranja rugby à XV Malagasy Miantso fitoniana i Zoky Fidy Bemasoandro

Sport
Zoma 01 Desambra 2017

Miantso fampihavanana eo amin’ny olana misy eo amin’ny tontolon’ny baolina lavalava eto amintsika i Zoky Fidy, mpitantana nandritry ny 23 taona tao amin’ny fileovana Bemasoadro.

“Tsy hisy tombony ho an’ny taranja ny disadisa ara-pitondrana ka tokony hifanatona, hifandresy lahatra ireo mpitondra, na inona na inona fanapahan-kevitra efa noraisina, ho mariky ny fitiavana ity taranja ity », hoy izy omaly. Naneho ny alahelony noho ny toe-draharaha manapotika ny taranja rugby amin’izao fotoana izao i Zoky Fidy ka nilaza ny fahavononany ho mpanelanelana mihitsy raha ilaina. Soso-kevitr’i Zoky Fidy ny hiverenana amin’ny fifaninanana Top 14 nahazatra, hialana amin’ny tsy fitovian-kevitra ka hampiakarina izay tokony hiakatra ary hampidinina izay latsaka. Tsy mety amin’i Zoky Fidy ny nametrahana ny Top 9 fa aleo kokoa aza ny Top 16, araka ny heviny, ka handraisana ny laharana fahatelo sy fahefatra tamin’ny fifaninanana inter-section ho ao anatiny. Tanjona ny hampivondronana indray ny tontolon’ny baolina lavalava, hiverenan’ny hasin’i Madagsikara hatramin’izay”, hoy izy.

Ntsoavina Evariste