Tapakilan’ny lalao olaimpika

Mbola tsara toerana i Laura Rasoanaivo

Sport
Talata 06 Febroary 2024

Taorian’ny faharesena tao anatin’ny Grand Slam de Paris nanoloana

ilay Frantsay Florine Soula, dia manohy ny fanovozana traikefa amin’ny fandraisan’anjara amin’ilay Training Camp International karakarain’ny Federasionina Frantsay eo amin’ny taranja judo i Laura Rasoanaivo. Ireo sangany maneran-tany amin’io taranja io no miatrika an’izany mandritra ny 4 andro ao amin’ny Ivon-toeram-pirenena momba ny judoa any Frantsa. Aorian’ny any Paris, dia hiazo an’i Dunavarsany any Hongrie ihany koa i Lura Rasoanaivo, ary hijanona 3 volana any amin’ny Foibe olaimpikan’ny Federasionina iraisam-pirenena. Voafaritra ihany koa anefa, fa hiatrika ny lalao Afrikanina amin’ny volana martsa sy ny fiadiana ny tompodakan’i Afrika Seniors amin’ny volana aprily i Laura Rasoanaivo. Tsara toerana hatrany amin’ny filaharana amin’ny lisitra olaimpika i Laura Rasoanaivo, raha ny ambaran’ny federasionina Malagasy. Laharana faha-4 amin’ny 12 eo amin’ny fifanintsanana kaontinantaly izy amin’izao, ary manana isa 1067. Ho an’i Afrika dia voalaza fa 12 avy na ho an’ny lahy na ho an’ny vavy ny « quota » isaky ny sokajy, afaka ny handray anjara amin’ny lalao olaimpika any Paris.
Nangonin’i Toky R