Sport

Tanànan’i Mahajanga Manjaka ny fitaterana amin’ny Bajaj

Sport
Sabotsy 24 Febroary 2018

Vao miditra ny tanànan’i Mahajanga ianao ankehitriiny dia misongadina ny loko mavomavon’ny Bajaj iray amin’ny fitaovana fitateran’olona hampisain’ny mponina an-davanandro ao amin’ity renivohitry ny voninkazo ity.

Azo lazaina fa manjaka dia manjaka ity fitaovam-pitaterana ity ankehitriny ao Mahajanga ao fa mahatratra hatrany amin’ny manodidina ny 1500 isa izy ireo no manana taratasy fahazoan-dalana amin’izany fitateran’olona izany hany ka zary mahalana dia mahalana sisa (azo isaina amin’ny ratsan-tanana ara-baikiteny) ireo taxi mivezivezy ao amin’ity tanàna ity ary zary lasa mitoko resaka etsy sy eroa sisa ataon’ireo mpitari-posy izay mahalana dia mahalana vao mba misy manontany ankehitrio. Raha ny fanadihadiana natao dia samy hafa ny tompon’ireto Bajaj miasa ao Mahajanga ireto fa misy ny mpamily manana ny azy manokana, ao ireo an’ny Malagasy mpanam-bola efa zatra misahana an’ity fitaterana ity ary ao ireo fananan’ireo vahiny toy ny karana sns… 30.000 ariary no fantatra fa hofan’ny Bajaj isan’andro ao Mahajanga ao. Manomboka amin’ny 1000 ariary isan’olona ny mitaingina azy raha toerana akaikikaiky. Afaka mitondra olona 2 samihafa anefa ny Bajaj iray raha mitovitovy ny lalana aleha ary manaiky an’izany ny olona efa tafiditra mialoha ao anatiny.

Ntsoavina Evariste