Sport

Super Coupe Analamanga Natolotry ny USCAR an’ny Ben’ny tanàna ny amboara

Sport
Alarobia 05 Septambra 2018

Tonga nanolotra ny amboara “Super Coupe Analamanga” ho an’ny Ben’ny tanàna Lalao Ravalomanana, tetsy amin’ny Lapan’ny tanàna Analakely omaly talata 4 septambra maraina, ny ekipan’ny kaominina Antananarivo Renivohitra (CUA) taranja baolina lavalava na ny USCAR (Union Sportive Commune d’Antananarivo Rugby).

Ny antony dia noho ny fandresen’ny USCAR tamin’ny famaranana ny “Super Coupe Analamanga” ny alahady lasa teo ka nahazoany ny amboara. Fifaninanana nokarakarain’ny Tambohobe sy ny CUA izy io. Nanambara ny Ben’ny tanàna Lalao Ravalomanana fa enin-kaja sy enim-boninahitra ny kaominina Antananarivo Renivohitra amin’izao fandresen’ny USCAR izao ary maniry hatrany mba hatanjaka kokoa noho izao ny ekipa. Nankahery sy nankasitraka ihany koa izy tamin’ny ezaka nataon’ny mpilalao ary mbola nitsodrano azy ireo amin’ny lalao manaraka hotanterahina ny 31 septambra ho avy izao hiadiana ny tompondakan’i Madagasikara. Noresahina teto koa ny fanamafisana ny fitondrantenan’ny USCAR izay misy mpilalao 44 mandrafitra azy. Marihina fa efa tompondakan’Analamanga ny ekipan’ny kaominina Antananarivo talohan’ny nahazoany ity “Super coupe Analamanga” ity.

Jean D.