Sport

Partagé sur :
• facebook

Tsy nahafa-po ny maro ny voka-dalaon’ny “Super Coupe” omaly izay nanamontsanan’ny FTM an’ny 3FB. Nanambara ny federasiona fa hanasazy.

Tsy mbola nisy ohatr’ity! Nomontsanin’ny FT Manjakaray, tompon’amboaran’ny filoha sy Top14 Analamanga, tamin’ny isa mavesatra 97-31 ny 3FB, tompon-dakan’i Madagasikara omaly tetsy amin’ny kianja Makis Andohatapenaka. Efa nitarika malalaka 45-16 ny Dakar hatreo am-pialantsasatra.

“Hita fa tena tsy nifandanja ireo ekipa ireo. Efa manomboka koa ny taom-pilalaovana dia nampihatra endri-dalao vaovao izahay ary nety ilay izy” araka ny nambaran’Andriamaro Hajasoa Maminarivo, mpanazatran’ny FTM. Tafavoaka nandresy kosa ny Cosfa tompondakan’i Madagasikara lefitra tamin’ilay lalao ho an’ireo fileovana tompon-daka lefitra, nandavo an’ny resy TFA tamin’ny isa 24-22 ary efa nitarika 19-6 ny miaramila teo ampialan-tsasatra.

Miala any ny sazy

Tsy nahafa-po ireo mpijery sy ny filohan’ny federasiona malagasin’ny rugby, Rakotomalala Marcel io voka-dalaon’ny FTM sy 3FB io. “Vita soamantsara aloha ny taom-pilalaoavana 2014 ary nisokatra kosa ny taom-pilalaoavana vaovao 2015. Mikasika ny lalao farany teo kosa dia tsy hitaza-potsiny ny federasiona fa hanasazy, hampiantso tompon’andraikitry ny 3FB fa manala-baraka ny rugby Malagasy sy ny 3FB ireny natao teo ireny.”

Ireo fifaninanana eto an-toerana no nikatona fa mbola maro ireo fihaonana iraisam-pirenena ao anaty fandaharam-potoanan’ny federasiona toy ny fiatrehan’ny Makis “junior” ny fiadiana ny tompon-dakan’i Afrika any Tonizia, ny fifaninanana ho an’ny U21 amin’ny aogositra ary ny fifanintsanan’ny Lalao Olimpika hatao Afrika atsimo.

Rasanda Serge

Tia Tanindrazana

Samia mijoro ho an'i Gasikara.