Sport

Partagé sur :
• facebook

Namaly bontana Rakotomalala Feno, filohan’ny ligin’Analamanga misahana ny rugby mikasika ny filazana fa hofoanana ny Top14 sy Top8 ary hatambatra ho fifaninanana tokana.

  Nanipika ny tenany fa tsy mbola tapaka ny mikasika an’io. Nisy tokoa ny fihaonana tamin’ny filoha federasiona sy Jean Luc Barthez tomponandraikitry ny World Rugby misahana fampandrosoana aty Afrika ary Berthin tao amin’ny foiben’ny federasiona fa tomban’ezaka no nifampiresahana tao. Nolazainy tamin’io fa tokony hatambatra iray ny fifaninanana eto Madagasikara, ny fahitany azy izay fa tsy hoe efa tapaka akory izany fa mbola mila hifampidinihana. Tsy ny tenako sy ny filohan’ny federasiona irery akory no tompon’ny rugby eto fa misy ireo teknisianina maro be. Sady efa hifarana ny fotoam-pitanatananay ka tsy izahay no hamaritra ny fandaharan’asa ho an’ny olona ho lany amin’ny taona 2016”. Nisy, hoy ny filohan’ny ligy, ny vokatra tsara azo tamin’io Top14 io. Nahitana taninketsa maro io na mpilalao na mpitsara, be dia be ny ankizy nivoaka tamin’io. Raha tena te hampandroso ny taranja dia ny fotodrafitrasa, fiofanana, fifaninanana no tokony hampiana, izao ity hiverin-dalana indray ve ? Amin’ny maha nosy antsika dia ny fiatrehana fifaninanana iraisam-pirenena no tokony hanampian’ny iraisampirenena antsika. Ireo ho lany vaovao eo no mila miady hevitra mikasika izay hampandrosoany ny rugby satria efa ho tapitra ny fotoam-pitantananay.

Rasanda Serge

Tia Tanindrazana

Samia mijoro ho an'i Gasikara.