Sport

Rtoa Atallah Beatrice Mila havaozina ifotony ny rafitry ny baolina kitra Malagasy

Sport
Alakamisy 27 Desambra 2018

Ny fijerena ny fanomanan’ny Barea ny CAN 2019 no vaindohan-draharaha imasoan’ny “Comité de normalisation” ny baolina kitra Malagasy ankehitriny, hoy Rtoa Atallah Beatrice filohany tao

anatin’ny fanatrehana ny fihaonan’ny Elgeco Plus sy ny Kaiser Chiefs teny Mahamasina ny sabotsy 22 desambra 2018 lasa teo. Dia efa hisaorana etoana ny CAF amin’ny fahavononany hanampy an’ity ekipam-pirenena Malagasy ity amin’ny fiatrehana ny fifaninanana. Hiala sasatra kely ohatra ny olona rehetra izahay ao anatin’izao fetin’ny faran’ny taona izao, hoy izy. Mikasika ny resaka fifidianana izay ho filoha vaovao hitantana ny FMF dia efa nambaran’ny “Comité de normalisation” tarihako fa ho “depart à zero” ny mikasika an’io resaka io ary tsy maintsy hisy fivoriambe hatao hamaritana ny zava-drehetra. Tsy maintsy hojerena manokana indray ny amin’ireo ligim-paritry ny baolina kitra 3 nitoeran’ny olana tamin’ny fifidianana teo aloha sy ny ligim-paritry ny baolina kitra iray hafa izay nisy nametraka fitoriana vao tsy ela akory izay. Ny hirariana anefa, hoy Rtoa Atallah Beatrice dia ny tsy hiverenana intsony amin’ireo disadisa nisy ireo mba hahafahana miroso haingana amin’ny fanarenana ny baolina kitra Malagasy izay heveriko manokana fa mila havaozin’ny mpitantanana ho avy ifotony mihitsy ny rafitra mitantana azy.

Ntsoavina Evariste