Real≠Barcelone niteraka resabe

Partagé sur :
• facebook

Niteraka adihevitra eo amin’ny tontolon’ny baolina kitra ny lalao nifanandrinan’ny Real de Madrid

sy ny FC Barcelone tao amin’ny kianjan’i Santiago Bernabéu ny alin’ny alahady teo. Nivoaka nandresy tamin’ny isa 3-2 ny mpampiantrano, saingy miteraka tsy fankasitrahana ho an’ny FC Barcelone sy ny mpanohana azy ny baolina izay tafiditr’i Lamine Yamal teo amin’ny faha-28 minitra, saingy nolavin’ny mpitsara ho mbola tsy nihoatra ny tsipika. Tsy misy rahateo ny fampiasana ny « goal line technology » eo anivon’ny Liga ka io no nentina nanehoana fa tsy voaporofo fa efa tena nihoatra ny tsipika ny baolina, raha toa ka manamafy ny ankilany, fa baolina efa tafiditra no noraisin’i Andriy Lunin. Nanamafy ny tsy fankasitrahany ny Filohan’ny FC Barcelone Joan Laporta, ary nangataka mihitsy ny hamerenana ny lalao. Miteraka fifampitsekerana goavana eo amin’ny tontolon’ny baolina kitra any Espagne eny fa na ho an’ny mpanaraka maneran-tany aza ity tranga ity, ka ao ny mandika azy ho « scandale » goavana, ary misy ny maneho ho fa tsy fahazakana resy. Taorian’iny fandresena nampiady hevitra azon’ny Real teo amin’ny andro 32 iny, dia mitarika mazava amin’ny isa 81 izy ireo ao anatin’ny Liga ary efa azo lazaina ho lasany ny tompondaka. Eo amin’ny laharana faha-2 kosa ny FC Barcelone izay manana isa 70. Henjana ny fahavoazan’ny Catalans satria vao ny herinandro nialoha an’io ihany koa ilay fifandonana nahararaka azy teo amin’ny ampahefa-dàlan’ny Champion’s League nanoloana ny sy Paris Saint Germain, izay niteraka fanasaziana henjana ny mpitsara noho ny fanapahan-kevitra voasokajy ho hafahafa, nanome karatra mena an’I Arauju sy ny mpanazatra Xavi Hernandez, antony lehibe nahararaka ny FC Barcelone.
Toky R
 

Tia Tanindrazana

Samia mijoro ho an'i Gasikara.