Sport

Rallye FSAM Ny 16 mey ny dingana voalohany

Sport
Alarobia 05 Mey 2010

Raikitra amin’izay, lasa izao ! Hotontosaina ny alahady 16 mey izao ny fifaninanana hazakaza-piarakodia “Rallye FSAM”, dingana voalohany amin’ny fiadiana ny tompondakan’i Madagasikara, rehefa nihemotra herinandro raha ny 8 mey ny daty voatondro voalohany tao anatin’ny fandaharam-potoanan’ny federasiona malagasin’ny fanatanjahantena mekanika (FSAM). Ny federasiona rahateo no tompomarika amin’ny fikarakarana ity fanokafana ity. Eto Antananarivo sy ny manodidina no hanaovana ny fifaninanana ny tontoloandron’io alahady io. Dingana manokana (Epreuves spéciales) 10 no voalahatra amin’io fotoana io ka hitotaly 110 km ny halavan’izy rehetra ireo ary mitovitovy amin’izay koa ny fampitohizan-dalana (Liaisons). Eny amin’ny tany malalaka enyAndohatapenaka ny toeram-pitobiana, fiaingana sy fahatongavan’ireo fiara mpifaninana. Raha ny alahady ny tena fifaninanana dia hisy hetsika hafa hatao eny an-toerana ny sabotsy 15 mey. Ny tapakandro maraina ny fifaninanana “open moto cross” sy “open quad”. Ny tolakandro kosa ny fizahana ireo fiara hifaninana amin’ny rallye harahin’ny fifaninanana “slalom auto”. Santatra amin’ireo dingana enina hanamarika ny taom-pilalaovana ihany io amin’ny 16 mey io fa hifanesy aorian’izay ireo ambiny ka ny roa amin’ireo dia ivelan’ny renivohitra, any Fianarantsoa sy Toamasina.

Hery Rabe

Taom-pilalaovana 2010

Dingana 1 : 16 mey – Rallye FSAM (Antananarivo)

Dingana 2 : 4-6 jona - Rallye Dzama Asacm (Antananarivo)

Dingana 3 : 6-8 aogositra - Rallye Tasamm (Fianarantsoa)

Dingana 4 : 24-26 sept - Rallye Inter Fmmsam (Antananarivo)

Dingana 5 : 29-31 oktobra - Rallye Tour de Tana (Antananarivo)

Dingana 6 : 10-12 desambra - Rallye Des Litchis (Toamasina)