Sport

Partagé sur :
• facebook

Nahitana fahombiazana fiovana fiara tamin’ny fotoana farany. Norombahan’ny ekipazy Guiguibone avy amin’ny ASACM ny “Rallye Elf-Michelin” izay dingana voalohany amin’ny fiadiana ny tompondakan’i Madagasikara natao ny faran’ny herinandro teo.

 Marihina fa voatery niova fiara andro vitsy talohan’ny fifaninanana ry Guiguibone izay tokony ho nanamory P306 saingy nihitsoka ny “boite” ka Mitsubishi Evo IX indray no nampiasain’izy ireo. “Sarotsarotra ihany ny hitazona izao vokatra izao satria hiverina amin’ilay P306 izahay amin’ireo dingana ambiny amin’ny fifaninanana nasionaly”, hoy i Guiguibone taorian’ity rallye voalohany ity. 1.40.03 no fotoana nahavitan’ity ekipazy ity ireo sedra manokana valo nirefy 121km voalahatra nandritra ny roa andro. Marihina fa sedra manokana enina tamin’ireo valo nifaninanana dia lasan-dry Guiguibone avokoa, ny fah-2 sy fah-7 ihany no votsotra. Tafiditra lah-2 ry Ndrianja sy Fanja nitondra Subaru Impreza sady voalohany amin’ny ekipazy lahy sy vavy miaraka (+02.38). Ity ekipazy ity no nahazo ny sedra manokana fah-2. Lah-3 i Freddy sy Yachine nanamory Isuzu D-Max izay voalohany ihany koa amin’ny sokajin’ny fiara tsy mataho-dalana na T2 (+07.55) ary nandrombaka ny sedra manokana fah-7. Fiara 14 tamin’ireo 33 nandray fiaingana ihany moa no tody hatramin’ny farany. Ny 18-20 jona indray ny “Rallye Asacm” dingana fah-2 manaraka.

Filaharana :

1-Guiguibone-Nath (Mitsubishi Evo IX) 1.40.03

2-Ndrianja-Fanja (Subaru Impreza) +02.38

3-Freddy-Yachine (Isuzu D Max) +07.55

4-Davonjy-Sandy (Foton Tunland) +08.01

5-Yves-Olivier (Subaru Impreza) +08.34

6-Mathieu-MD (Golf) +10.46

7-Tovonen-Riaria (Clio 16s) +11.57

8-Ferre-Jean Pierre (Mitsubishi Evo VI) +21.38

9-Ando-Sameer (Clio) +39.11

10-Dominique-Tahiry (VW Polo) +56.41

Tia Tanindrazana

Samia mijoro ho an'i Gasikara.