Sport

Naratra i Abel Anicet Tsy afa-miakatra kianja telo herinandro

Sport
Alatsinainy 28 Septambra 2020

Naratra tamin'ny fanazaran-tena nataony tao amin'ny klioba izay ilalaovany dia ny Ludogorets Razgrad any Bulgarie ny kapitenin'ny Barean’i Madagasikara Abel Anicet ny zoma lasa teo.

Maharitra eo amin'ny 3 herinandro eo ho eo ny fitsaharana tsy ahafahany miakatra eny ambony kianja. Mazava ho azy fa tsy ho eo izy amin'ny fampivondronana izay hatao eto France amin'ny voalohan-dohan'ny volana oktobra, hoy ny Mpanazatra Nicolas Dupuis, izay niresaka taminy. Ho eo sy ho tafiaraka amin’ny Barea soamantsara kosa izy amin’ny fihaonana amin'ny Côte d'Ivoire (9-17 novambra), hoy ny mpanazatra. Nambarany fa mahakasika ilay fampivondronana indray dia any Luxembourg no mety hanatanterahana azy raha ny safidy noho ny fahatahorana an'ilay covid-19. Ny olona any koa mahay mandray olona rahateo, fa indrindra indrindra mba mampihena ny vola mivoaka avy amin'ny fanjakana Malagasy, hoy i Nicolas Dumpuis. Mirary fahasitranana haingana ho an'i Anicet Abel isika rehetra, hoy izy namarana ny hafatra nataony. Nirarakopana moa ny firariana fahasalamana haingana ho an’i Abel Anicet tamin’ny tambajotran-tserasera, ary efa naneho fisaorana sy fankasitrahana ity Kapitenin’ny Barea ity.

Toky R