Mpilalaon’ny Barea

Naratra mafy i Melvin Adrien

Sport
Alatsinainy 18 Desambra 2023

Ho sahirana indray ny Barea hitady izay hatao mpiandry tsatokazo amin'ireo lalao kasaina hatao ny volana Marsa io.

Naratra mantsy i Melvin Adrien ny faran'ny herinandro teo raha nihaona tamin'ny RC Pays de Grasse ny Thonon Evian hilalaovany. Vao 8 minitra monja dia voadona mafy ny lohaliny ary dia ny mpamonjy trano may no nitondra azy tany amin'ny hopitaly. Maharitra am-bolana maro ny fitsaboana azy araky ny fanambaran'ny Thonon Evian azy. Ho sarotra ny raharaha satria i Nina koa dia mbola tsy afaka hilalao. Asa anefa fa ny fahavoazana ho an'ny sasany mety ho fifalian'ny hafa ka raha tsy lasa amin'izao i Allan Rakotovazaha dia tsy fantatra intsony. Misy ilay Rapeto be ao amin'ny Paris FC iny anefa efa milaza vonona hanao Barea. Teva Gardies no anarany ary mirefy 2 m 02 izy. Miankina amin'i Bolida anefa izany ary inoana fa tsy ho sarotra. Ny mampiahiahy kely anefa dia hoe ngeza be ity mpilalao ity ka sao dia...ariary be.
Clément RABARY