Sport

Mpibata fonjam-by Malagasy Nandrombaka medaly 9 tany Egypte

Sport
Alakamisy 02 Mey 2019

Ny Dgs “Tale Jeneralin’ny Fanatanjahantena Malagasy”, Rtoa Rosa Rakotozafy, nisolotena ny minisitra Tinoka Roberto no nitarika ny fitsenana ny delegasiona Malagasy,

teny amin’ny seranam-piaramanidina iraisam-pirenena teny Ivato omaly alarobia 01 mey 2019 tolakandro, avy niatrika ny fiadiana ny ho tompondakan’i Afrika teo amin’ny taranja Fibatana Fonjam-by notontosaina tany Egypte ny 24-29 aprily 2019 lasa teo. Medaly niisa 9 no voandalana nentin’ity delegasiona ity nody an-tanindrazana ka ny 6 tamin’ireo volamena avokoa ka ny 3 norombahin’Andriantsitohaina Eric Hermana sokajin-danja -55 kg teo amin’ny “arraché 102 kg” sy “épaulé-jeté 20 kg” ary teo amin’ny “total olympique 222 kg”, ny 3 hafa dia azon-dRandafiarison Rosine sokajin-danja 55 kg vehivavy (70 kg, 80 kg ary 150 kg) . Ny 3 ambiny kosa dia medaly volafotsy norombahin’Andriantsitohaina Tojoniaina Alain sokajin-danja – 67 kg (133 kg, 167 kg, 300 kg). Laharana faha-4 kosa no azon’i Ravololoniaina Elysa Vania tompondakan’i Afrika tamin’ny 2018. Tsy tongatonga ho azy fa vokatry ny fanazarantena nikirizana 10 ka hatramin’ny 15 taona tany ho any ary nohatevenin’ny nanaovana fampivondronana voalohany hiatrehana ny lalaon’ny nosy 2019 natrehana farany teo no nahazoana izao vokatra izao, hoy ny filohan’ny federasiona Harinelina Randriamanarivo Jean Alex nitarika ny delegasiona niaraka tamin’ny Dtn, Rakotoarison Thomas d’Aquin. Voninahitra lehibe ho an’ny Malagasy izao vokatra azo izao, hoy Rtoa Dgs Malagasy, fa manaporofo sahady ny famerenana ny fiandrianam-pirenena Malagasy, araka ny voalazan’ny velirano faha-13 nolazain’ny filohan’ny Repoblika, miainga amin’ny tanora. Mbola horaisin’ny minisitry ny fanatanjahantena Malagasy ireto atleta ireto nefa dia efa nanatsidika sahady izy fa tsy maintsy hampian’ny Minjs manokana ny taranja Fibatana fonjam-by Malagasy noho ny zava-bitany sy hahazoany miatrika ny lalao olimpika 2022. Notoloran’ny federasion’ny taranja tolona taratasim-bola 600.000 ar tsirairay avy teny Ivandry, omaly, izy 3 mianadahy nahazo medaly sy ny Dtn haltérophilie Malagasy.