Mijanona ho mpanazatra

Partagé sur :
• facebook

75% amin’ny karamany aloan’ny Fanjakana, 25% FMF

Nivaha ny olana eo amin’ny fanazavana ny ekipam-pirenena Malahasy eo amin’ny baolina kitra. Tontosa ny sabotsy 21 febroary teo ny fifanarahana tamin’i Corentin Martins hanohy indray ny asany, manamarika dingana vaovao ho an’ny Barea. Raha ny filazan’ny Minisitry ny Tanora sy ny Fanatanjahantena, dia tsy niova ny karama, saingy misy fanatsarana ara-teknika sy ara-pitantanana tafiditra. Ny Fanjakana no handray an-tanana betsaka amin’ny vesatra ara-bola (75%), ary ny FMF kosa hanampy amin’ny 25%. Manodidina ny 18 000 euros na 91,7 tapitrisa Ar isam-bolana eo moa ny karaman’i Corentin Martins, raha ny fahafantarana azy. Anisan’ny fanavaozana lehibe ny fanampiana mpanazatra mpanampy sy mpitsabo ara-batana ao amin’ny staff. Ireo no heverina fa hanamafy ny fahaiza-manao sy ny fahavononan’ny ekipa amin’ny fifaninanana lehibe. Ny fifanarahana dia herintaona ihany, saingy azo havaozina arakaraka ny vokatra. Tanjona lehibe ny hahazoan’i Madagasikara toerana amin’ny CAN 2027. Raha tratra izany, dia hisokatra indray ny fifampiraharahana eo amin’ny MJS, FMF ary ny mpanazatra. “Misy ady lehibe amin’ny fahazoana ny vokatra. Hiasa mafy izahay mba hahatratra izany,” hoy izy. Nanampy izy fa: “Ny mpilalao dia efa naneho zavatra mahaliana. Izany no mahatonga ahy mbola mitohy miaraka amin’ny Barea, satria nahita fahafinaretana niaraka tamin’izy ireo aho.”, hoy i Corentin Martins. Andrasana ny vokatra !
Toky R

Tia Tanindrazana

Samia mijoro ho an'i Gasikara.