Sport

Mafibe No Drug – Ong Ny Sahy Ny Rca Ambatobe no nandroaka ny omby

Sport
Talata 10 Aprily 2018

Ny ekipan’ny Rca avy eny Ambatobe tamin’ireo ekipa 8 nandray anjara (Ajs Tsarahonenana, As B52 Ankadindramamy, As Jayah Ambanivato, Ass Soamanandrariny, Cousin Sports Ambohimahitsy,

Kfa Analamahitsy, Rca Ambatobe ary ny Scb Besarety) no nandroaka ny omby natolotry ny filoha Hery Rajaonarimampianina sy ny amboara kalisy lehibe tamin’ny fifaninanana baolina kitra Mafibe No Drug nokarakarain’ny Ong Ny Sahy notanterahina teny amin’ny kianja Enam Androhibe ny alahady 8 aprily tontolo andro. Resiny tamin’ny Tirs au but 4-2 ny Ass Soamanandrariny teo amin’ny lalao famaranana rehefa nisaraka ady sahala 1-1 ny roa tonta teo amin’ny fe-potoana ara-dalàna 25 minitra in-droa niditra. Tonga nanotrona ka nanokatra an’ity famaranana ity sy nanolotra ny amboara tamin’izany ny SG-n’ny Cicld rantsamangaikan’ny Primatiora, ny jeneraly Hama Dimby. Nomarihan’Atoa Ramamonjisoa Haja filohan’ny Ong Ny Sahy fa lalao Mafibe noforonin-dry zareo tamin’ny taona 1999 dia natokana hotanterahina 1 andro ihany tsy an-kiato ka mila tanjaka sy fiomanana tsara eo amin’ny mpilalao, araka izany. Isaorana, hoy izy, ireo nanaparitaka an’ity hetsika ity nanerana ny nosy.

Ntsoavina Evariste