Sport

Ligue des Champions Adin’ny samy Anglisy ny famaranana

Sport
Alakamisy 09 Mey 2019

Nampangitakitaka ! Izay no mahafintina ny lalao nifandonan’ny ekipan’ny Ajax sy Tottenham miverina manasa-dalana faharoan’ny ligue des champions halina.

Tena nifandimbiasana ny fanafihana. Nisantatra ny famonoam-baolina ny Ajax tamin’ny alalan’i Matthijs de Ligt 5 minitra nanombohan’ny lalao. Nampiditra ny baolina faharoa mbola ho an’ny Ajax ihany i Hakim Zyieck teo amin’ny minitra faha-35. Tany amin’ny fidirana faharoa kosa nanezaka mafy ny Anglisy, totoafo ny fanafihana sy ny andrana nampidi-baolina. Nody ventiny ny rano nantsakaina teo amin’ny faha-55 minitra tamin’ny alalan’i Lucas Moura ary mbola ingahirainy ihany no nampiditra ny baolina roa farany teo amin’ny minitra faha-59 sy faha- 96, izany hoe nandritra ny fotoana fanampiny izay nahatratra 6 minitra. Kivy tanteraka ry Ajax izay hita fa tena nanao baolina. Hafaliana tsy omby tratra kosa ny an’ny ekipan’i Tottenham hiatrika ny lalao famaranana izay toa lasa fifaninanam-pirenena Anglisy satria Liverpool no hifanandrina amin’izy ireo ny 1 jona ho avy izao any Madrid. Hafaliana roa sosona ny an’ny Anglisy ary nanakoako nanomboka halina ny hoe ny Anglisy no tompon’ny baolina e ! Mifanandrify amin’ny nahazoan’ny Printsy Harry sy ny vadiny Megane Markle zazalahy moa izany rehetra izany.

RTT