Sport

Ligin’ny Rugby Vakinankaratra Voahosotra ho tompondaka rejionaly ny fileovana 3FAI

Sport
Talata 14 Mey 2019

Nifarana tamin’ny alahady 12 mey teo rehefa naharitra efa-bolana (janoary-mey 2019) ny fiadiana ny ho tompondakan’ny ligin’ny Rugby ao Vakinankaratra izay nandraisana fileovana 11 anjara.

Voahosotra ho tompondaka rejionalin’ny ligin’i Vakinankaratra taona 2019 ny 3Fai Ambalavao Isotry rehefa nandavo ny Tfma Antsirabe 92-00 teo amin’ny lalao famaranana. Omaly alatsinainy 13 mey tetsy amin’ny foiben-toeran’ity klioba ity tetsy Tsaralalàna no nanoloran’ireo mpilalao an’ireo mpitantana azy notarihan’ny filoha lefitra Rainimanga Etienne ny amboara azony tany Antsirabe. Nambaran’ireo mpitantana fa nanampy betsaka tamin’ny fahombizan’ny 3Fai ny tohana lehibe sy matotra nentin’ny filohany Rakotonirina Raissa, tsy mikely soroka mikarakara ny klioba. Hisaorana koa, hoy izy ireo, ny ligin’ny rugby ao Vakinankaratra tarihan’ny filohany sy ny SG Rakotonirina Alain tamin’ny fikarakarana matotra nataon’izy ireo nahatanteraka an’iny fifaninanana iny. Efa an-dalam-pivoarana ny taranja rugby ao Vakinankaratra ao, hoy ny feo heno tetsy Tsaralalàna omaly fa mila fifandonana avy aty ivelany misimisy kokoa. Tombony ho an’ny 3Fai kosa ny efa nahaela azy teo amin’ny sehatr’ity rugby ity.

Ntsoavina Evariste